Posts from ‘March, 2019’
कच्छी चोण ब जण के खपॅ कतरो
कच्छी चोण
—————
—————
ब जण के खपॅ कतरो
धी के जमाइ कोठे व्या
पुतर के वहु पाढे वइ
हाणें ता पां ब ज रया.
हकडो छापो दुध जी थेली
रोज नंढी मटुकडी
पाणी जजो थइ प्यो.
चा ने खंड जा डाबला
मड खाली थीए.
कोलगेट\\मसरी डेढ मेणो हलॅ
एंशी ग्राम जी लक्स गोटी मेंणो हलॅ.
जमें में शाक वे
त दाळ न वे तोय हलॅ
रोगी दाळ वे तोय भयोभयो.
ब डीं ये खचडी ने छाय
सो कोबी, पा दुधी
अढीसो भींढा
लींबो-कोथमरी
हप्ते जो शाग
बाचको धउं, पंज कीला चोखा, कीलो तेल
गोंध थे प्यो राशन.
नंढा टोपला-छीबा ने वाटका
ब थाळी अठ डो वासण
हकडा कीलो विम पावडर
महिनो न खुटे.
खोपरे जी शीशी
पफ-पाउढर-टीला आंनण
फक्का थचा
प्रेम-लागणी ड्यो
हतरा ओछा
खल-मस्ती मोज मजा मेळावा खपें ज वठ्ठा लगे मठ्ठा
धी-जमाइ, पुतर-वउ
कडेंक अचें
पोतरा-पोतरी, दोयतरा-दोयतरी अचें
पसली, नवो वरे, वीया-वधाणां
ब-चार डीं
ने पोय उडी वने
अचीजा बईआर मलबो
पल में पाछा
बे जण
पोय यादुं, रटण ने जुनी गाल चोसार्युं!
ब जण के खपॅ कतरो
धी के जमाइ कोठे व्या
पुतर के वहु पाढे वइ
हाणें ता पां ब ज रया.
ब जण के खपॅ कतरो
ही ज सत्य आय
स्वीकार्यो ने माॅज से रोयॉ
: लहेर
अध्धा
अध्धा
*****
पग ते व्यारे चाग करे,
एनजो नालो अध्धा…
*****
पग ते व्यारे चाग करे,
एनजो नालो अध्धा…
गाल गाल मे वेवार समजाय,
एनजो नालो अध्धा…
पांजो सुख दु:ख नेरे,
एनजो नालो अध्धा…
छडी खणी छांभ कढे,
एनजो नालो अध्धा….
हणी करे ने पोय पस्ताय,
एनजो नालो अध्धा…
पोय पासेमें व्यारे सरचाय,
एनजो नालो अध्धा….
पोय चाग से मथे हथ फेरे,
एनजो नालो अध्धा…..
अध्धा वगर धोनिया अधुरी
અધ્ધા
પગ તે વ્યારે ચાઞ કરે,
એનજો નાલો અધ્ધા…
પગ તે વ્યારે ચાઞ કરે,
એનજો નાલો અધ્ધા…
ગાલ ગાલ મે વેવાર સમજાય,
એનજો નાલો અધ્ધા…
પાંજો સુખ દુ:ખ નેરે,
એનજો નાલો અધ્ધા…
છડી ખણી છાંભ કઢે,
એનજો નાલો અધ્ધા….
હણી કરે ને પોય પસ્તાય,
એનજો નાલો અધ્ધા…
પોય પાસેમેં વ્યારે સરચાય,
એનજો નાલો અધ્ધા….
પોય ચાઞ સે મથે હથ ફેરે,
એનજો નાલો અધ્ધા…..
અધ્ધા વગર ધોનિયા અધુરી