Posts under ‘Kutchi Kavita,Chovak,Sahitya (Poetry, Quotes, Literature)’

કેંકે મિડે ખાસા લગેં કેંકે મિડે ભુછડા

હિક્યાર કૃષ્ણ ભગવાન વટ કોરવ ને પાંડવ ભેરા થીને વિઠા હુવા. તડેં કૃષ્ણ ભગવાન પૂછયોં હિન જગમેં રાજાયેં મેં સચીલા(સજણ) કિતરા અંઈને ખોટા કિતરા અંઈ સે લજી અચો.

તડેં દુર્યોધન ચેં હિન મેં મિડેજ રાજા ખોટા અઇં તેં પુઠીયા યુધિસ્થિર ચ્યોં કોય રાજા મુંકે ખોટો નતો લગે. જિતરી જેં મેં સચાઇ સે ખાસા ગુણ ન્યારે ને જેંમેં અવગુણ ઘણે હુવેં સે અવગુણ ન્યારે ‘જૅડી જેંજી નજર’ કેંકે મિડે ખાસા લગેં કેંકે મિડે ભુછડા. ઇન મથા હી ચોવક પઈ જૅડી જેંજી નજર.

કચ્છી મેં ચોવક જો અર્થ : લેખક અરવિંદ ડી. રાજગોર

केंके मिडे खासा लगें केंके मिडे भुछडा

हिक्यार कृष्ण भगवान वट कोरव ने पांडव भेरा थीने विठा हुवा.तडें कृष्ण भगवान पूछ्यों हिन जगमें राजायें में सचीला(सजण) कितरा अंइने खोटा कितरा अंइ से लजी अचो.

तडें दुर्योधन चें हिन में मिडेजा राजा खोटा अंइ तें पुठीया युधिस्थिर च्यों कोय राजा मुंके खोटो नतो लगे.जितरी जें में सचाई से खासा गुण न्यारे ने जें में अवगुण घणे हुवें से अवगुण न्यारे ‘जॅडी जेंजी नजर’ केंके मडे खासा लगें केंके मिडे भुछडा. इन मथा ही चोवक पई जॅडी जेंजी नजर.

कच्छी में चोवक जो अर्थ: लेखक अरविंद डी.राजगोर

सॉणें न ब कन हूंधे तूं,
सिखें “हें…हें कुरो ?” कईंधे तूं.

सोख हूंधे न समजे कीं,
डोखमें ज सिखें रुंधे तूं.

कख तोडी़ ने के ब टोकर,
सिखें परबारो खेंधे तूं.

सत समागम न के कडें,
सिखें न पगला छूंधे तूं .

डिंधल डिने भिसियाल “बिहारी” ,
सिखे न हथ वारींधे तूं .

: बिहारीलाल अजाणी

विञो मिंधर उपासरे में क मस्जिदमें;
न बिइ कोय गाल, स्वर्ग जो लारो हुंधो !

: लीलाधर गडा

विञो : विनॉ

अखर पाटी ता भुंसजॅ,
फिटे कागर ता साई.
पण लिखावट ललाट जी,
फिटे नती फिटाई.

: नेणसीं भानुसाली “जानी”

वीर पसली जे डीं ही सुंदर कच्छी गीत

भॅणूं
***

हूंधो भवांतरे जो लॅणूं !
निका भला कीं जुड़ें भाऐं के जिजल जॅड़युं भॅणूं!

सगा हजारुं, सगाईयुं लख, गडजी गजें करोडुं,
लुछें विठयुं प कुछें न लिखपण ! भॉरप जो नां भॅणूं !

भांऐं भांऐं के भेरो के ला भुछड़युं थींन्युं भेणूं,
जिगर विगर की जडी़ सगॅ को ? रत जयुं डिई डिई रॅणूं !

जिरकलडी़ के जांपलीऐनुं जचॅ न बारा विनणूं,
पखा छडी परडेस विने त्युं तांय कुरेला , भॅणूं !

समजू च्यां, संभारी रखजा, सूंवालीयुं अईं भॅणूं,
धूऐ विगर पण धुखणुं कीं से, क्यांनुं सिखंधो छॅणूं !

कितरीयुं कसल्युं, कितरीयुं पसल्युं, कितरो गिनणूं डीणूं,
सुतर राखड़युं, उंतर लागणयुं, लसॅ भला कीं लॅणूं ? !

: डॉ विसन नागडा

गडजी : मिली,भेटी . रॅण : संधाण

भा : बाल काव्य

निंढडी़ ऊ निसाड़ पाछी वारे ड़े ! पांजी ऊ अगाड़ पाछी वारे ड़े !
मिठा मिठा मीं पाछा वारे ड़े ! ऊ निंढपण जा ड़ी पाछा वारे ड़े !

: जयेस भानुसाली “जयु”

धिलसें धूलारा थींधासीं ,
अखियें ओतारा डींधासीं.

मॅभूभ मिठा मन मॉजीला !
आंके न अचें को पण हीला,
धरीया धिलसें धावत डिईनें ,
प्रेमरस प्यारा पींधासीं….

अईंयूं असीं आंजा धीवाना ,
आंजी मॉभतमें मस्ताना ,
सथूआरो मिले अगर आंजो ,
अभजा तारा गूंथींधासीं ….

अईं जान कनां पण वला जानी ,
आं वटे लगे़ धुनिया फानी ,
आंजे सड जे ऑठे ऑठे,
जिजा जनमारा जिंयंधासीं….

: व्रज गजकंध

कच्छ कच्छी कच्छीयत

       ( १ )
उमेध मनमें एतरी,
     कच्छ थीये आभाध !
कच्छी बोली जुग़ जीये,
     कच्छी करीयें याध  !

     ( २ )
मातानूं वडो डेव नांय,
      माजी मनमें याध  !
मातृभूमि मा-बोलीजी,
      नित करीयां आराध !

     ( ३ )
मा-बोली ! जीयें सदा,
     कच्छी करीयें प्यार  !
हींयें में आसन डींयें,
     करीं सदा जयकार  !

      ( ४ )
मुसाफरी हलंधी विठी,
     जेसीं आऊं जीयां  !
मालक ! पूरी आस कर  !
      पोय, मॉत मिठो करीयां  !

     ( ५ )
आस खबर आ ‘ तूंहींके,
      हिकडी़ धिल धारई  !
कच्छी बोली जीये सदा,
      रातॉय-डीं सारई  !

 : माधव जोसी ‘अस्क ‘

पांजा भाईबंध ब , सचा समरथ अईं ;
पंज पंज नोकरें वारा , पांजा ब हथ अईं .

: कवि दुलेराय काराणी