Kutchi Maadu Rotating Header Image

Posts under ‘Kutchi Kavita,Chovak,Sahitya (Poetry, Quotes, Literature)’

नमजे एतरो …

“जानी” नमजे एतरो,
नमे जेतरो कंध,
ऊ खपी वेया नाधान में,
जें छडई नमे जी हंध
: कवि नेणसीं भानुसाली “जानी”

મિલણ

મિલે તેંસેં મિલૉ
નકાં જુધાઈ મેં ટિલૉ ,
મોં ચડાઈ હલેં
તેં સેં સામેંનૂં કીં ખિલૉ
:વ્રજ ગજકંધ

कच्छी ओकलॅ आतमा …. !

लिखी सगां तो गुर्जरी , हिन्दी पण निर्वाण !
कच्छी ओकलॅ आतमा , वरसे परसे प्राण ! वरसे परसे प्राण !
   : कवि लालजी नानजी जोसी

माटली : बाल कविता

माटली रे माटली,
पाणी भरे जी माटली
माटली सटूकडी़,
रमो प्या मटूकडी़,
रमँधे रमँधे तरा आयो,
पाणी भरी मथे चडा़यो .
मथे ता सीनोंणी,
सिरी विइ अकोणी,
खणी खणी पची रिइयां,
गारे में आउं घची रिंइयां,
माटली वी काणी,
मिडे़ वुङी़ व्यो पाणी !
:कवि डॉ. वसंतजी नागडा
अकोणी : मस्तीखोर

*हली अचॉ कां अचण डयॉ*

हली अचॉ कां अचण डयॉ
***************
अहेसान कर्यॉ ऐतरो , अखियुं त मिलण डयॉ !
अखियुं त मिलण डयॉ , गुलभधन त खिलण डयॉ !
आं वट करे कोरो भला , आकाश जी परी ;
अबोट ऍडे़ रूप जा, धिधार त करण डयॉ ! …
खोल्यॉ आंजे धिलजा अईं भंध ही कमाड़ ;
वेसां अचे ऐतरी, धड़कन त सोणण डयॉ ! …
चेल ने ही चाल हाय ! मुरकें तां लालमलाल !
कुँवारा आंजा चप वल्ला ! लिख त चुमण डयॉ ! …
हंध विछाय हिंयें जा ‘अश्क’ वाटडी़ न्यारे !
कां त हली अचॉ हिते , कां त अचण डयॉ !…
: माधव जोशी “अश्क”
चेल : कमर , हंध : आसन

ખેતરનું ભલેં ….

ખેતરનું ભલેં અસીં બાર ‘વાસીં ,
મૉલ કનાં તાંય કિડા ધાર ‘વાસીં !
કોય ન તો ડિઈ સગૅ નાલો જેંકેં ,
અસીં ઍડે સગપણ જો સાર ‘વાસીં !
: કવિ ડો. વસંતજી નાગડા

*कच्छ जी कमाड़*

कच्छ जी कमाड़
*********
हां रे ! मैया कच्छ जी कमाड़ ! देश देवी रखवाल !
माडी़ आशापुरा ! तुं दयाळी ! —
प्रगटेयें आपो आप डेरे रुपारे
आशापुरा ! अरजी तॉ देवचंदजी पारे
हां रे ! वार्यें नथी तुं निरास , हली अचें रखी आस ;
माडी़ आशापुरा ! तुं दयाळी ! —
वाँझियें घर पींगा माडी़ ! तुं ती बधायें
अंधेंके अखियुं डीयें , लंगडा़ हलायें
हां रे ! भुख्यें-उञ्यें के अन्न-पाणी, डीयें कच्छ जी घणीयाणी !
माडी़ आशापुरा ! तुं दयाळी ! —
चाचरा जे स्नान जो , मैमा अंति भारी
तार्यें भव सागर म्यां , तॉजी बलियारी
हां रे ! अचें लक्खुं नर नारी , विञे तॉते वारी ! वारी !
माडी़ आशापुरा ! तुं दयाळी ! —
नॉरातें में धूप दीप , पूजा अर्चा आरती
चंडी पाठ रास छंद , होम हवन भारती !
हां रे ! आसन हिक़डे़ खडगधारी , कापडी़ वें व्रत धारी !
माडी़ आशापुरा ! तुं दयाळी ! —
रवेची रुद्राणी काली , कामाख्या चामुंडा
तुलजा भवानी चंडी , मंशा दुर्गा अम्बा
हां रे !नमें तॉके महीपाल , नमें जाडे़जा भूपाल !
माडी़ आशापुरा ! तुं दयाळी ! —
माधु जोषीजी कज , पूर्ण तुं ही आशा
सच ते रख निर्मल कज , तन मन ने वाचा
हां रे ! कच्छडे़ जो बेडो़ पार , नीरों रख तुं जियार !
माडी़ आशापुरा ! तुं दयाळी ! —
: माधव जोशी “अश्क”

शहीदेंके सिलाम !

पां सार्यों उनीजी शहीदीके , कुलभान कयों जें जिंधगानी.
कच्छजी आनो शान मान लाय , सिलाम ! लख लख अय जानी !
: माधव जोशी “अश्क”

કચ્છી ગીત : કોધરતજી પાયલ

છનન છમકાર છમકે તી અરે ! કોધરત સંધી પાયલ !
અસાંજે ધિલકે ઈ પલમેં કરે ગમખ્વાર ને ઘાયલ
મિઠા મીં અજ વઠા મેંભૂભ જેડા મોભતી જગમેં
હવાજી લેહરમેં લેરે નીલુડો મખમલી છાયલ !
– છનન ….
ગુલાભી ગુલ ખિલી સામેં અચે ગુલશન મિંજા સૂંણા
સનમ જે ચહેરેજી સુરખી ભની મલકેં મિડે કૂંણા,
હિતે શબનમ ભની બુંધ બુંધ શોભે હાર વિખરાયલ !
– છનન ….
ખોશી જંગલ જ્ભલ ભારી , કણોકણ છાઈ ખોશહાલી
પંખી કલશોર તા કરીએં જગા અજ નાંએ કોં ખાલી
મિઠી મોભતમેં થઇ મામુર ટહુંકે મસ્ત કારાયલ !
– છનન ….
જુકો ધિલ મેં ચગઈ રંગત , સે અજ આંસમાનમેં ડસજે
ભરમ એડા ડઠા પ્રીતમ ! ખોલાસો કો નતો સમજે ,
ડિઠયું ચોફેર મું ધિલભર જ્યું અખિયું મસ્ત શરમાયલ
: પ્રીતમ જોશી
કોધરત સંધી : કોધરત જી , સૂંણા : સૂંહાણા , જ્ભલ : ડુંગર , મામુર : ચકચૂર

नाखुवा : कच्छी कविता

नाखुवा , होडी़ हाकार ! नाखुवा ,
नाखुवा , होडी़ हाकार !
विञणुं सामे पार ! नाखुवा,
नाखुवा , होडी़ हाकार ! …
वा तूफानी वंइये ता सामे , लह्ररयुं डुंगर धार !
विज वराका, वडर गज्जें, मिंय प मुसलधार
कंधी का आर न पार ! नाखुवा ,
नाखुवा , होडी़ हाकार ! …
नॉलो मुसाफिर अइयें तुं भी, नॉली धरियावाट !
आय पुराणी तोजी होडी़ , पूरी नांय आलाघ !
हथ तॉजा पतवार ! नाखुवा ,
नाखुवा , होडी़ हाकार !
सिक ज सच्ची आय मन में , महभूभ मिलण मनठार !
हेंमथ हिंयें में रक्खी ने तुं , होडी़ तुंहीं जी हाकार !
मौला थींधो मधधगार ! नाखुवा,
नाखुवा , होडी़ हाकार !
: माधव जोशी “अश्क”