आँउ चाँउ : हडताल मारें विधें

चाँउ: ’को भा आँउ अञ तोजी हिकडी भाझार भंध आय? अखते ही केडो कारो दाबलो बधे आय’?
आँउ: ’ही मिडे बेंकवारेजा ’दो’ अईं’.
चाँउ: ’को तो बेंकवारेसें मारामारी के’?
आँउ: ’न न, गाल एडी नाय प ईन पुठीयाँ वडी ”अंधरजी आखाणी’’ थिई विई’.
चाँउ: ’त भले सुणाय तोजे ध्ररधजी आखाणी’.
आँउ: ’यार आँउ दाकतर वटें मोतीएजो ’उपरेश’ करायला व्यओ हो सें’.
चाँउ: ’अडे तुं केडो ढंगधडे विगरजो माडु अईंएं. ईन गालमें विचाडो दाकतर केडां आयो’?
आँउ: ’या पूरी गाल त करे लाय दे. तुं तकडो बोरो भला’.
चाँउ: ’भले चो वेलो’.
आँउ: ’दाकतर चें ५०००/- थींधा. से आँउ कभूल क्या. त साहेब च्यों रोकडा दे. प आँउ त कितरा थिंधा ई खबर न हुई एतरे चेक खणी व्यो हो सें. से साहेबके दिनुं. पण साहेब
चें क चेक पास थिये पोय उपरेशन करींधोसें. चेक रखी विञ, २ दिं पोय अचीज. तेस
तईं तोजो चेक पाचो न आयो त पास थिई व्यो ईं समजी तोजो उपरेशन कंधासीं.
हाणे २ दि पोय आँउ उपरेशन ला व्योसें.

सहेब मुंके बांकडेते सुमारे ने मोंते ढक बधीने मिशीन मिशिन लगायों.
पंज दो मिलिटमें त मिडे पती व्यो. साहेब नईं अख लगाए दिनो.
ने साहेब मिडे समजायों विठे क ही ही धवा लगायजी, मेंणुं दिं न नायजो अखते
पाणी न पे से ध्यान रखेजो’.

चाँउ: ’खासो मिडे पती व्यो. गालमें जिजो मोण न विज. पोय गाल आगळ वधाय’.
आँउ: ’पोय थई रामायण. अञां साहेब गाल पूरी कं ते तेस तईं त कम्पाउंढर धोडंधो धोडंधो आयो ने चें, साहेब ईनजो चेक त पाछो आयो आय.
साहेब चें खातेमें पैसा नईं क ब्यो किं कारण आय?
त कम्पाउंढर चें साहेब, बेंक वारा २ दिंजी हडतालते उतरी व्या अईं. हाणे ४ दिं पोय
चेकजी खबर पे. त साहेब मुंके चें क हि गिन तोजो चेक पाछो ने दे मुंजी अख पाछी.
ईं चईने दाकतर वरी मुंके बांकडेते सुमारेने अख पाछी कढे गिडें.
साहेब चें हाणे जडें रोकडा खणी अचीने तडें तोजो उपरेशन थिंधो. पांजी बेंकेंवारेंजो
भरोसो न थिये कडे हडतालते उतरी विञें’.
ई सुंणीने गडोडेके ताव अची व्यो अने कागडे एडी त काण मढें क ईनजा ब्या गच भावर
प भेरा थईने तालमें केंजी क मोंकाण मंढ्यो. हेडी ’कागवाणी’के त खेरखां माडु पण नाय समजी सग्या, त पियुषजी केडी आलाध?
ई किकराट सुणी आँउ चाँउके पण उभे जेडो न लगो.
पोय आँउ जी अखजो कुरो थ्यो ए पियुषके खबर नाय.

आंजो पियुष. १-९-१२
piyushsutra@gmail.com