Kutchi Maadu Rotating Header Image

Posts under ‘Kutchi Kavita,Chovak,Sahitya (Poetry, Quotes, Literature)’

*कच्छ जी कमाड़*

Apr 27th, 2010
by sachin.
No comments yet
कच्छ जी कमाड़
*********
हां रे ! मैया कच्छ जी कमाड़ ! देश देवी रखवाल !
माडी़ आशापुरा ! तुं दयाळी ! —
प्रगटेयें आपो आप डेरे रुपारे
आशापुरा ! अरजी तॉ देवचंदजी पारे
हां रे ! वार्यें नथी तुं निरास , हली अचें रखी आस ;
माडी़ आशापुरा ! तुं दयाळी ! —
वाँझियें घर पींगा माडी़ ! तुं ती बधायें
अंधेंके अखियुं डीयें , लंगडा़ हलायें
हां रे ! भुख्यें-उञ्यें के अन्न-पाणी, डीयें कच्छ जी घणीयाणी !
माडी़ आशापुरा ! तुं दयाळी ! —
चाचरा जे स्नान जो , मैमा अंति भारी
तार्यें भव सागर म्यां , तॉजी बलियारी
हां रे ! अचें लक्खुं नर नारी , विञे तॉते वारी ! वारी !
माडी़ आशापुरा ! तुं दयाळी ! —
नॉरातें में धूप दीप , पूजा अर्चा आरती
चंडी पाठ रास छंद , होम हवन भारती !
हां रे ! आसन हिक़डे़ खडगधारी , कापडी़ वें व्रत धारी !
माडी़ आशापुरा ! तुं दयाळी ! —
रवेची रुद्राणी काली , कामाख्या चामुंडा
तुलजा भवानी चंडी , मंशा दुर्गा अम्बा
हां रे !नमें तॉके महीपाल , नमें जाडे़जा भूपाल !
माडी़ आशापुरा ! तुं दयाळी ! —
माधु जोषीजी कज , पूर्ण तुं ही आशा
सच ते रख निर्मल कज , तन मन ने वाचा
हां रे ! कच्छडे़ जो बेडो़ पार , नीरों रख तुं जियार !
माडी़ आशापुरा ! तुं दयाळी ! —
: माधव जोशी “अश्क”

शहीदेंके सिलाम !

Apr 25th, 2010
by Jay जय.
No comments yet
पां सार्यों उनीजी शहीदीके , कुलभान कयों जें जिंधगानी.
कच्छजी आनो शान मान लाय , सिलाम ! लख लख अय जानी !
: माधव जोशी “अश्क”

કચ્છી ગીત : કોધરતજી પાયલ

Apr 18th, 2010
by Jay जय.
No comments yet
છનન છમકાર છમકે તી અરે ! કોધરત સંધી પાયલ !
અસાંજે ધિલકે ઈ પલમેં કરે ગમખ્વાર ને ઘાયલ
મિઠા મીં અજ વઠા મેંભૂભ જેડા મોભતી જગમેં
હવાજી લેહરમેં લેરે નીલુડો મખમલી છાયલ !
– છનન ….
ગુલાભી ગુલ ખિલી સામેં અચે ગુલશન મિંજા સૂંણા
સનમ જે ચહેરેજી સુરખી ભની મલકેં મિડે કૂંણા,
હિતે શબનમ ભની બુંધ બુંધ શોભે હાર વિખરાયલ !
– છનન ….
ખોશી જંગલ જ્ભલ ભારી , કણોકણ છાઈ ખોશહાલી
પંખી કલશોર તા કરીએં જગા અજ નાંએ કોં ખાલી
મિઠી મોભતમેં થઇ મામુર ટહુંકે મસ્ત કારાયલ !
– છનન ….
જુકો ધિલ મેં ચગઈ રંગત , સે અજ આંસમાનમેં ડસજે
ભરમ એડા ડઠા પ્રીતમ ! ખોલાસો કો નતો સમજે ,
ડિઠયું ચોફેર મું ધિલભર જ્યું અખિયું મસ્ત શરમાયલ
: પ્રીતમ જોશી
કોધરત સંધી : કોધરત જી , સૂંણા : સૂંહાણા , જ્ભલ : ડુંગર , મામુર : ચકચૂર

नाखुवा : कच्छी कविता

Mar 29th, 2010
by sachin.
1 comment
नाखुवा , होडी़ हाकार ! नाखुवा ,
नाखुवा , होडी़ हाकार !
विञणुं सामे पार ! नाखुवा,
नाखुवा , होडी़ हाकार ! …
वा तूफानी वंइये ता सामे , लह्ररयुं डुंगर धार !
विज वराका, वडर गज्जें, मिंय प मुसलधार
कंधी का आर न पार ! नाखुवा ,
नाखुवा , होडी़ हाकार ! …
नॉलो मुसाफिर अइयें तुं भी, नॉली धरियावाट !
आय पुराणी तोजी होडी़ , पूरी नांय आलाघ !
हथ तॉजा पतवार ! नाखुवा ,
नाखुवा , होडी़ हाकार !
सिक ज सच्ची आय मन में , महभूभ मिलण मनठार !
हेंमथ हिंयें में रक्खी ने तुं , होडी़ तुंहीं जी हाकार !
मौला थींधो मधधगार ! नाखुवा,
नाखुवा , होडी़ हाकार !
: माधव जोशी “अश्क”

माडी तोझी मानी : कच्छी गीत

Feb 27th, 2010
by Jay जय.
3 comments
मिणियां मूंके मिठी लगेती माडी तोझी मानी
माडी तोझी मानी में तां जोबन जोम जुवानी ….. मिणियां
धींगी कच्छडेजी धरती, धींगी बाजरजी मानी
धींगा तोजा हथडा माडी , धींगो कच्छी पाणी …… मिणियां
मेमाणें के मेमानीमें मान ज डींधल मानी
देवेंके पण दुरलभ एडो दान ज तोजो दानी …… मिणियां
माडी तोजे हथजी मानी , मुंजी इज कमाणी,
‘काराणी’ चे अमरत जेडी, मिठडी माजी मानी …… मिणियां
: कवी दुलेराय काराणी

मुंझी मातृभुमि के नमन!

Feb 21st, 2010
by Jay जय.
15 comments
munjimatrubhoomi
Aay Valo Asanjo Vatan, Munji Matrubhoomi ke Naman………..!!!!!!!!!!!!!!

तान में ने तान में !

Feb 13th, 2010
by sachin.
2 comments
महेफिल मे रंगत विइ वघी , इं तान में ने तान में !
ने रात व्यामी विइ सजी , इं तान में ने तान में !
इं तां घाँली वाटींधे भी, यार ! केंके ती अचे ;
व्यासीं खटी ही रांघ अजजी, तान में ने तान में !
यारें जी संगत जो चडी़ व्यो , अइं पोछाँ म ऐडो कैफ;
हेकला मस्ती में झुमों , तान में ने तान में !
केर हुवासीं ? कीं मिल्यासीं ? प्यार माण्यो कीं असीं ?
रिइ न सुघ कीं भी असांके , तान में ने तान में !
पंध ओखो हो भलें ने , डिस प न्यारइ न कडें ;
‘ अश्क ‘ मन्झील ते पुगासीं, तान में ने तान में !
: माधव जोशी “अश्क”

हकल : कच्छी बाल गीत

Feb 4th, 2010
by Jay जय.
3 comments
हकल
हिकड़ों , बो , त्रे , चार
हैया नकरो घरनुं बार.
पंज , छ , सत , अठ,
भेरी खण झा हथ में लठ.
अठ , पोठिया अइं गणझा नों ,
साथ डिने झा खणझा सों,
झेडा़ नों अइं तेडा़ डो,
भडवीरें के केडो़ भो.
डो-वी कइंधे थींधा सो,
इगिया इगिया हलँधा रो !
: कवि डो वसंतजी नागडा

कच्छ वतन

Jan 31st, 2010
by Jay जय.
No comments yet
वल्ला वतन कच्छ ! असीं , सदा विठा सारीयूं
पल न विसारीयूं ! पल न विसारीयूं !
कारो धोरो नीलवो , घिणोधर निनामुं
झारो डुंगर धार्यों असीं, सदा विठा सारीयूं !
निंधों, वडो रिण नेरयुं, निंढा वडा वेटा उ;
धारिया ज्यूँ लरयुं ! असीं, सदा विठा सारीयूं !
गोंयुं मेंयुं रिढ़ पॉयुं उठियुं भटारीयुं;
खीर नित विलोड़यों असीं, सदा विठा सारीयूं !
रापार भचाउ मडई मुनरो अंजार न्यारः
भोज ज्यूँ भाजारयुं असीं, सदा विठा सारीयूं !
काफ़यूं गीत रास रंग , पावा सोणायुं चंग;
सांई के संभार्यों असीं, सदा विठा सारीयूं !
पेरुं बेर लीयार लर, खारक मेवा बावर खर;
गुवार मुड बाजरीयुं असीं, सदा विठा सारीयूं !
मोरला मलारियें नित कुंजड़युं कुणकारियें ;
सेंण ! आँकें सार्यों असीं, सदा विठा सारीयूं !
सुरा संत सांयर पीर , डातार जन्में जते;
सतीयूं पघमणीयुं असीं, सदा विठा सारीयूं !
मालक जी छल थिए मेर, विछड़या मलें थिए खेर ;
बेडयुं कच्छ हाकार्यों असीं, सदा विठा सारीयूं !
: माधव जोशी “अश्क”

कच्छी बोली बोल मेठा !

Jan 30th, 2010
by Jay जय.
1 comment
कच्छी बोली बोल
मेठा ! तूँ कच्छी बोली बोल !
कच्छी बोली बोल
तूँ  धिलझी अच्छी बोली बोल !
मेठा ! तूँ …..
कच्छी बोलो  
कच्छी लक्खों
कच्छी वांचयों
कच्छी सक्खों !
: माधव जोशी “अश्क”
← Earlier Posts
Newer Posts →