१ बोले तेंजा बेर वेकांजे
२ न बोलेमें नों गोण
३ चरैइ सावरें न वेने ने डाइ के शिखामण दे
४ संप तेते जंप
५ बकरो कढयों त ओठ वेठो
६ राजा वाजा ने वांदरा त्रोय सरखा
७ बगलमें छोरी ने गाममें ढंढेरो
८ अघुरो घडो छेलकाजे बोरो
९ पारकी मां ज कन वेंधे
१० जेडा न पोजे रवि, ओडा पोजे कवि ने जेडा न पोजे कवि ओडा पोजे अनुभवी.
११ टीपें टीपें सरोवर भराजे
१२ लमेंथी डुंगर फोटरा
१३ लोभीया होंय ओडा धुतारा भोखें न मरें
१४ शेर जे मथे सवाशेर
१५ शेठजी शिखामण जांपे तांइ
१६ वड जेळा टेटा ने पे जेळा बेटा
१७ राम रखे तेंके केर चखे
१८ ओठ जा एळोय अंग वेंघा
१९ जेजा हथ सोहामणा लगें
२० माकुळी के कण नें हाथी के मण
२१ संघरेलो सप पण कमजो
२२ खोध्यों डुंगर ने नेकरयो उंदर
२३ झेजीयुं किडीयुं सप के ताणीयें
२४ चेतंधल माळु मेंणीया सोखी
२५ सो दिं ससजा त हेकळो दिं नों जो
२६ .पोतरजा लखण पारणेमें नें नों जा लखण बायणेंमें
२७. दोकारमें अधिक मेंणु
२८.हेकडो संध्यो तेरो तोटें
२९. मां से मां ब्या मेळे वगडेजा वा
३०.धीरजजा फळ मेठा
३१.कुएमें होय त अवाडेमें अचे
३२.सो सोनारजी नें हेकडी लोहारजी
३३.राजाके गमे से राणी
३४.कमाणी अठ आनी ने खरचो रूपीयो
३५.सोके भेरो नीरो बरे
३६.लेखमी चांदलो केण अचे तेर केपार धुतेला न वेनाजे
३७.पोख्यो तेळो पाम्यो
३८.वखाणेल खेचडी दंधेंमें अळैइ
३९.दशेराजे दिं घोडा न धोडें
४० जेळो संग तेळो रंग
४१.भंध मोठ्ठ लखजी
४२.लख मेल्या न नें लखेश्री थ्या न
४३.नाणे वेगरजो नाथीयो नाणे नाथालाल
४४.लालो लाभ वेगर न लुंटे
४५. पै जी पेदाश न नें घडीजी नेवराश न
४६.धुबीजो कोतो न घरजो न घाटजो
४७.धरमजी गांयजा दंध न नेराजें
४८.हाथी जीरो लखजो, मरे त सवालखजो
४९.वर मरे, क, कन्या मरे ब्राह्मणजी जोली भरे.
५०.खेले तेंजो घर वसे
५१.फेरे से चरे बंधेला भोखें मरें
५२.घरजा छोरा घंटी चटीयें ने पाडोशीयें के अट्टो
५३.रात थुडी ने वेस बोरा
५४.न मामा करंता काणो मामा सारो
५५.मन होय त मांढवे वेनाजे
५६.अणी चोकी वेंधल सो वरे जीये
५७.पारकी आशा हमेशांला निराशा
५८.बारें वरें बावो बोल्यो
५९.जेंके कोय न पोजे तेंके तेंजो पेट पोजे
६०.नाला वडा ने दरशन खोटा
६१.लत्तेंजा भुत गालीयें न वरें
६२.घरें घरें मेट्टीजा चोल्ला
६३. झेझा गुमडा ने झेझी पीडा
६४.आग लगे तेर वाय खोदेला न वेनाजे
६५.अंधेंमें काणुं राजा
६६.खडो खोधे से छणे
६७.केडा राजा भोज नें केडा गंगु तेली
६८.नमे से मेणींके गमे
६९.होय तेर दियारी नें न होय तेर होरी
७०.भेंसजे सामें भागवत न वे
७१.मंगे वेगर मां प न पेरसे
७२.हेकडो संध्यो तेसुंधे तेरो तोटें
७३.न बोलंधल में नों गोण
७४.शेठजी शिखामण झांपे तांइ
७५. मोंमें रामनाम ने बगलमें छोरी
Posts under ‘Festivals’
कच्छी चॉवकुं
असीं कच्छी
असीं कच्छी~~~~~
वतन जी वालप नें हुभ जा संचरें विठा “सन”
परडेस में पण कच्छी सुणो त चुसा थीएं “कन”
मीं क मेंमाण अचे तॅर मुरके असांजो “मन”
पिंढ जे पंध हल्या विञो पचायुं नं केजो “पन”
डातारी नें धरमाधा में खरच्युं असांजो “धन”
बरुको नें निमराइ वारो’अरूर’ असांजो
“अन”
:अरूर भा
#(सन, कन ,मन, पन ,धन,अन)
🌷🌷🌷🌷🌷🌷🌷🌷🌷
અસીં કચ્છી
વતન જી વાલપ નેં હુભ જા સંચરેં વિઠા “સન”
પરડેસ મેં પણ કચ્છી સુણો ત ચુસા થીએં “કન”
મીં ક મેંમાણ અચે તૅર મુરકે અસાંજો “મન”
પિંઢ જે પંધ હલ્યા વિઞો પચાયું નં કેજો “પન”
ડાતારી નેં ધરમાધા મેં ખરચ્યું અસાંજો “ધન”
બરુકો નેં નિમરાઇ વારો’અરૂર’ અસાંજો
“અન”
कच्छ अलग राज्य भनायला आह्वान
मिणींके कच्छी भासा मेज बोलेजी अरज आय.
जय कच्छ !
पंज महत्वजा कार्य पांजे कच्छ ला
पांजी मातृभूमी कच्छ, मातृभासा कच्छी ने पांजी संस्कृति ही पांला करे अमुल्य अईं. अज कच्छ में ऊद्योगिक ने खेतीवाडी में विकास थई रयो आय. बारनूं अलग अलग भासा बोलधल माडु प कच्छमे अची ने रेला लगा अईं. हॅडे वखत मे पां पांजी भासा ने संस्कृति के संभार्यूं ही वधारे जरूरी थई व्यो आय. अमुक महत्व जा कार्य जे अज सुधी पूरा थई व्या हुणा खप्या वा ने जे अना बाकी अईं हेनमेजा जे मिणीयां वधारे महत्वजा अईं से नीचे लखांतो.
अज जे आधुनिक काल में जमाने भेरो हले जी जरूर आय. अज मडे टी.वी. ने ईंटरनेट सुधी पोजी व्यो आय. हॅडे मे पांजा कच्छी माडु कच्छी भासा मे संस्कृति दर्सन, भजन, मनोरंजन, हेल्थ जी जानकारी ने ब्यो घणें मडे नेरेला मगेंता ही सॉ टका सची गाल आय. हेनजे अभाव में पांजा छोकरा ने युवक पिंढजी ऑडखाण के पूरी रीते समजी सकें नता. खास करेने जे कच्छ जे बार रेंता हु कच्छी भासा ने संस्कृति थी अजाण थींधा वनेंता.
अज कच्छ जे स्कूल में बो भासाएँ में सखायमें अचॅतो गुजराती ने ईंग्लीस. कच्छी भासा जे पांजी मातृभाषा आय ने घणे विकसित आय ही हकडी प स्कूल नाय जेडा १ थी १० धोरण सुधी सखायमें अचींधी हुए. कच्छी भासा जे उपयोग के वधारे में अचॅ त ही कच्छीयें ला करे सारी गाल आय ने स्कूल में सखायमें अचे त हनथी सारो कोरो. भोज, गांधीघाम जॅडे सहेरें में जेडा बई कम्युनीटी ( गुजराती,सींधी,हींदीभाषी,….) जा माडु प रेंता होडा ओप्सनल कोर्स तरीके रखेमें अची सगॅतो. १ थी १० क्लास सुधीजो अभ्यासक्रम पांजा कवि, साहित्यकार ने शिक्षक मलीने लखें त हेनके स्कूल में सखायला कच्छी प्रजा मजबूत मांग करे सगॅती. जॅडीते गुजरात, महाराष्ट्र,…. मे मातृभासा जो अभ्यासक्रम त हुऍतोज.
आऊं तिरंगो
Independence song First time in kutchchi language: आऊं तिरंगो🇮🇳on K3 kutchchi YouTube channel
गीतकार : मनीषा अजय वीरा ‘मन’
संगीतकार: जयेश नरोत्तम आशर
गायिकी: अंकिता जीगर देढीया, जयेश नरोत्तम आशर
कोरस: सुनील शरद विश्राणी, जयश्री राहुल देढिया, हरेश मुरजी गाला
डिरेक्टर: सुनिल शरद विश्राणी
एडिटर: मुकेश देढिया ‘मानव’
—————
*आऊं तिरंगो…..lyrics*
आऊं तिरंगो आजाधी सें फिरकांतो
‘जन गण मन’ राष्ट्रगान गाईंधे लॅरांतो
भारतीयें जे धिलमें आऊं राज कईंआतो
“वंदे मातरम्” “जयहिंद” नारा गजाईंधे
भारत जे ‘विजयपथ’ ते शानसें हलांतो
मूं धૉरो रङ सांती डियेतो
नें लीलो खुसीजो प्रतिक चૉवाजॅतो
केसरीयो तां तीलक थिई ने सोभेतो
नें ‘अशोकचक्र’ मईमा मूंजो वधायतो
आऊं तिरंगो आजाधी सें फिरकांतो
गांधी बोझ पटेल नहेरु तिलक जोरधार
लाला ते तां थेआ भारी लाठी अत्याचार
भगतसिंह सुखदेव राजगुरु फांसी चड्या वा
कच्छ जा श्यामजी कृष्ण वर्मा क्रांतिकारी वा
आऊं तिरंगो आजाधी सें फिरकांतो
छाभास आय जनम डींधल माइतरेंके
चाग઼लेंके रजा डींधे कारा असू न वतांया
मान आय सहीधेंजी कुरभानी ते
सन्मानसें ऊनींजी ननामी ते सुमांतो
आऊं तिरंगो आजाधी सें फिरकांतो
भ्रष्टाचार आतंकवाध के पाठ सिखाईंधॅ
डेसविडेस प्रगतीजी भारत जलें आय वाट
सुखसांती समृध्धीजा ‘मन’पाया खૉडीयांतो
डेसजी मिटी जी फोरुं धुनीयाभरमें फૉराईंयातो
आऊं तिरंगो आजाधी सें फिरकांतो
*मनीषा अजय वीरा ‘मन’*
मुंबई
First time in kutchchi language: આઊં તિરંગો🇮🇳on K3 kutchchi YouTube channel
ગીતકાર : મનીષા અજય વીરા ‘મન’
સંગીતકાર: જયેશ નરોત્તમ આશર
ગાયિકી: અંકિતા જીગર દેઢીયા, જયેશ નરોત્તમ આશર
કોરસ: સુનીલ શરદ વિશ્રાણી, જયશ્રી રાહુલ દેઢિયા, હરેશ મુરજી ગાલા
ડિરેક્ટર: સુનિલ શરદ વિશ્રાણી
એડિટર: મુકેશ દેઢિયા ‘માનવ’
—————
*આઊં તિરંગો…..lyrics*
આઊં તિરંગો આજાધી સેં ફિરકાંતો
‘જન ગણ મન’ રાષ્ટ્રગાન ગાઈંધે લૅરાંતો
ભારતીયેં જે ધિલમેં આઊં રાજ કઈંઆતો
“વંદે માતરમ્” “જયહિંદ” નારા ગજાઈંધે
ભારત જે ‘વિજયપથ’ તે શાનસેં હલાંતો
મૂં ધૉરો રઙ સાંતી ડિયેતો
નેં લીલો ખુસીજો પ્રતિક ચૉવાજૅતો
કેસરીયો તાં તીલક થિઈ ને સોભેતો
નેં ‘અશોકચક્ર’ મઈમા મૂંજો વધાયતો
આઊં તિરંગો આજાધી સેં ફિરકાંતો
ગાંધી બોઝ પટેલ નહેરુ તિલક જોરધાર
લાલા તે તાં થેઆ ભારી લાઠી અત્યાચાર
ભગતસિંહ સુખદેવ રાજગુરુ ફાંસી ચડ્યા વા
કચ્છ જા શ્યામજી કૃષ્ણ વર્મા ક્રાંતિકારી વા
આઊં તિરંગો આજાધી સેં ફિરકાંતો
છાભાસ આય જનમ ડીંધલ માઇતરેંકે
ચાગ઼લેંકે રજા ડીંધે કારા અસૂ ન વતાંયા
માન આય સહીધેંજી કુરભાની તે
સન્માનસેં ઊનીંજી નનામી તે સુમાંતો
આઊં તિરંગો આજાધી સેં ફિરકાંતો
ભ્રષ્ટાચાર આતંકવાધ કે પાઠ સિખાઈંધૅ
ડેસવિડેસ પ્રગતીજી ભારત જલેં આય વાટ
સુખસાંતી સમૃધ્ધીજા ‘મન’પાયા ખૉડીયાંતો
ડેસજી મિટી જી ફોરું ધુનીયાભરમેં ફૉરાઈંયાતો
આઊં તિરંગો આજાધી સેં ફિરકાંતો
*મનીષા અજય વીરા ‘મન’*
*મુંબઈ – બોરીવલી*
सुभ डीयारी | डीयारी जी मिणीके जिज्यूं जिज्यूं वधाईंयू
~*~*~*~*~*~*~*~*
डीयारी आवई वला डीयारी मनायूं
एडी पिरभेजीं मा’राणी डीयारी मनायूं
हींये उमंग भरी हुंभसे पिरभ मनायूं…(२)
फटाकें जी तडाफडी…अंगण रंगोडी सजायूं
एडी पिरभेजीं मा’राणी….
जगमगाट डिसजे रंगबीरंगी बतीयूं…(२)
कंढील लगाई…डीये जी जोत जगायूं
एडी पिरभेजीं मा’राणी…..
मेवा मिठाई वला नित नवी वानीयूं…(२)
जिलेभीने फाफडेजी…मिजभानी उडायूं
एडी पिरभेजीं मा’राणी…..
धन ने लखमी जा वडा पूजन करायूं…(२)
खिली खिलाई वसंत…डीयारी मनायूं
एडी पिरभेजीं मा’राणी…
– वसंत मारू…चीआसर
————————-
डीयारी जी मिणीके जिज्यूं जिज्यूं वधाईंयू
नॅ वरेज्यूं शुभेच्छाऊं
अशाढी बीजजी घणें वधायुं 🍨 साल मुबारक!
———————
बीज जे चंधरतां आसाड उतरे,
पालर वडरें जे पडरेंतां नितरे.
कामाय डिसीनॅ वग઼डो पाछो वरे,
खेतर खिली खीडू઼एं के नૉतरे.
न्यारे इंधरलठके नॅ रण प्यो ठरे,
मॅनथ भेराभेर, माडू઼ मन जोतरे.
चૉपा चरॅं जीव मातर सौको परे,
तराके करे तिलक टुबण पिई तरे.
नयें वरेमें, कच्छी नईं आस भरे,
मोरजी पीछीसें नां चितर चितरे.
अमृताबा डी.जाडेजा.
तुंबडी कच्छ
अषाढी बीज जो कच्छी खिले कच्छी खिले,
नवे वरॅजी वधाई ड઼ें ने बखे मिले बखे मिले.
नजर ईंनजी अभ मथे ने
वला घर घर में सीरो रजे (2)
ए…अषाढी बीज जो (2)
कच्छी खिले (2)
कारा भम઼र वड઼र डिसजे,
गज઼ गज઼ेने विज઼ छणे (2)
जरमर जरमर, धोधमार मीं वसे,
ने हैये मिजानुं उंमगजी लॅर छूटे.
ए…अषाढी बीज जो (2)
कच्छी खिले (2)
छिभछिभ छोरा छिभछिभीयां कैयें,
भिज઼भिज઼,भिज઼भिज઼ खेडू भिज઼े,
रूमझूम रूमझूम नारी पै जूमें,
थनगन थनगन मोर नचे.
ए….अषाढी बीज जो (2)
कच्छी खिले (2)
मिटी मिजानुं मेंक छूटे ने,
आंधरी चोपेजी सूंघीने ठरे.
किलभिल किलभिल पंखी उडे,
जेन्ती जी धरा नीली छम सोभे.
ए..अषाढी बीज जो (2)
कच्छी खिले कच्छी खिले
नयॅ वरॅजी वधाई डे ने बखे मिले (2)
जयंती छेडा पुनडीवारा “जेन्ती”
અષાઢી બીજ જો કચ્છી ખિલે કચ્છી ખિલે,
નવે વરૅજી વધાઈ ડ઼ેં ને બખે મિલે બખે મિલે.
નજર ઈંનજી અભ મથે ને
વલા ઘર ઘર મેં સીરો રજે (2)
એ…અષાઢી બીજ જો (2)
કચ્છી ખિલે (2)
કારા ભમ઼ર વડ઼ર ડિસજે,
ગજ઼ ગજ઼ેને વિજ઼ છણે (2)
જરમર જરમર, ધોધમાર મીં વસે,
ને હૈયે મિજાનું ઉંમગજી લૅર છૂટે.
એ…અષાઢી બીજ જો (2)
કચ્છી ખિલે (2)
છિભછિભ છોરા છિભછિભીયાં કૈયેં,
ભિજ઼ભિજ઼,ભિજ઼ભિજ઼ ખેડૂ ભિજ઼ે,
રૂમઝૂમ રૂમઝૂમ નારી પૈ જૂમેં,
થનગન થનગન મોર નચે.
એ….અષાઢી બીજ જો (2)
કચ્છી ખિલે (2)
મિટી મિજાનું મેંક છૂટે ને,
આંધરી ચોપેજી સૂંઘીને ઠરે.
કિલભિલ કિલભિલ પંખી ઉડે,
જેન્તી જી ધરા નીલી છમ સોભે.
એ..અષાઢી બીજ જો (2)
કચ્છી ખિલે કચ્છી ખિલે
નયૅ વરૅજી વધાઈ ડે ને બખે મિલે (2)
જયંતી છેડા પુનડીવારા “જેન્તી”
