Kutchi Maadu

🌹🌹पांजो कच्छ🌹🌹
***********************
कच्छ पांजो कामणगारो ,
नेत याद अचे पांके बोरो ,
खटेलां परदेश वगर नांय आरो ,
ने मोज केलां कच्छ जेडो नाय कीं न्यारों ,
कच्छ के कीं विसराजे आय ई त प्यारो प्यारो ,
वस्या भले परदेश में छतां प धिल करे कच्छलां धबकारो।

मींयडा वस तुं मोज सें असांजे वतन कच्छ ते
न्याल करी डे कच्छ के अषाढी बीज जो अच
भांभरे त्युं गोयुं मैयुं वछेरा ने वच्छ
मोरला प मलार करींता मुंध ते वेलो अच
वार न लगाइजा
वहेलो अची वसी पो …

अषाढ उभो आय उंभर तें जेठ थ्यो पूरो!
वसी पो वला मोडो म कर ऐयें सतें पेढीयें सुरो!

वसी पो तुं वेलो अची डुकार डिठा अयीं गच
ब्या डिठा अैइ वांचडीया ने धरा धुबेजो डप
खेड आडु हरोरी करींये ब्ये गोठ वने जी गत
नर्मदा मा जे आसरे ते मड मड रेइ आय पत
हाणे जल्धी अच
पाणी व्या पातार में …

मन छडी ने वस वल्ला मोडो कर म वीर!
सिकें असांजीयुं अखडीयुं न्यारेला मिठडा नीर!

ओगनाय छड डेम तरा ने मोराय डे राममोल!
आणां पियाणां जियाणां खोंभी जो माहोल!

ठा जला़य म ठाकर ही लगे नतो खासो!
वसी पो वला वमभरे म कर जिजो तमासो!

पाणी व्या पातार में वाडीयुं सुकीयुं भठ्ठ
डेम तरायुं खाली खम अंइ पाणी नाय निपट
वगडो सोको वेरान थेयो आय जनावरें जी नांय गत
झाड पोखेजो जोर करीयुं प पाणी आय तो वट
पर्यावरण के लगी पिट
वेसलो न कर वसे पो …

वेसलो न कर वसीपो बारो मिंजा डीइ छड अध
चोवटुं करे इन्धर सें कर्यों वसे जी गत
डीठा नैयुं कइ टेम से अभ में इन्धर लठ्ठ
रंग जमी रे कच्छ ते वसायों एडी वस
प्रभु रखो हाणे पत
कच्छडे के तुं न्याल कर …

Reference : email

वागड जा पीलु मिठा नें
चोबारी जा लीयार!
खावडे जी मिठाइ तां संभरे लारोलार!
मडई जी मिठी आमरी
बिदडें जा आमां!
ध्रभ जी खारक खाराईंधा मामा
माकपट जो गुंध गुगर
कंठी जा कुंढेर
बन्नी पच्छम जा खीर मखण!
सजे कच्छ में लीला लहेर!

Reference : email from Kachchhi Maadu

भतार वेया भुलाजी …
ने वाट नती लजे सीम जी…

खेतर रेया खेड नुं …
ने खरा थई वेया खोटा..

वडील वेया वाट गेनी….
त गाम में वधी पेया ओटा…

Reference : Whatsapp msg

મિઠી ધરતી મિઠા નીર..
ઉતે જન્મે ક્રાન્તીવીર…
જિતે પૂજ઼ા જે ગઉ જો ખીર..
ઉતે ડિસાજે ડાનીવીર…
જિન રત મેં સિજ઼ જી સીર..
ઉત્ અવતરે સંતસુધીર.

Reference : Whatsapp msg

માં તુ ત મુજી મઠી માવડી
તોકે કરીયા લખુ પરણામ
ઘુળીએમે લોદા વજી
મઠીયુ નંધરુ ત કરાઇએ
નારાઇએ ધોરાઇએ
મઠા દૂધ ત પીરાઇએ
મુતે રખે નજર તમામ
માડી તોકે લખુ પરણામ
બાયુ જલે પળખા ફેરાઇએ
બાવેવટા નજરુ કઢાઇએ
તોજે લૂગળેમે અગળીયુ વજાઇએ
પણ મુકે લુગળા પેરાઇએ તમામ
માડી તોકે લખુ પરણામ
આઉ રુઆ ત તુ પણ રુનીએ
આઉ ખલા ત તુ પણ ખલઇએ
ઓદો અચેલા કેકે ન દનીએ
ખોરેમે ખણી રાત વિતાઇએ
હથ જલે હલઘે સખાઇએ
તુ નરીએ ન તોજા હાલ તમામ
માડી તોકે લખુ પરણામ
વેઠકરે મુકે ભણતર ભણાઇએ
ભોખઇ રઇ તુ મુકે ખારાઇએ
સચાઇજુ વાટુ વતાઇએ
ધુનીઆજુ રીતુ સખાઇએ
ભોલ થઇ ત લપાટ લગાઇએ
ચાગ પુરીએ તમામ
માં તોકે લખુ પરણામ
માડું ભનાય મણીવચ ઉભો કરીએ
વિયા વધાણા તુ હોંશે કરીએ
દશી ઇ મળે તુ જલધે ન જલાઇએ
વખાણ બોરા મુજા ત કરીએ
બાધા આખળીયુ મુલા ત રખીએ
પણ તુ કેર કીં રખે ન સવારથ તમામ
માડી તોકે લખુ પરણામ

Reference : Whatsapp msg