Kutchi Maadu

મેણે વૈશાખજી રાત ઉજારી,
ભેણ નોમ શનિવારજી રાત ઉજારી;
પરભુડેજે ઘરે અજ વગી થારી…

હીનાજી કુખમાંથી આવઇ ધી;
હેત ને આનંધજો વરસ્યો મીં… … …પરભુડે

જયા ને મીતાજા મન હરખાય;
આશા ને પીયુસજો આનંધ ન માય…પરભુડે

મુનરા ગામમેં વ્યા સમાચાર;
ચોડો ડીં વેલો થ્યો ચમતકાર… … ….પરભુડે

સગેને સમધીજી લમી કતાર;
મણીજે નેણમેં આનંધ અપાર .. … …પરભુડે

રાધાનિવાસમેં આનંધ આનંધ;
મમઇજી મેર આયો સારો પરસંગ … પરભુડે

રતડીએવારી તું રક્ષા કરીજ;
માવડી ને ધી કે સુખ ડીજ. … … … ..પરભુડે

: “ધુફારી”

શિયાળે સોરઠ ભલો ને ઉનાળે ગુજરાત,

વરસારે વાગડ ભલો ને મુંજો કચ્‍છડો બારો માસ !

“તરાજી પારતે“

હલો ત અજ હલી ને વ્યોં તરાજી પારતે;
ભુતડા ઉત ફોલેને ખ્યોં તરાજી પારતે.

જુવાનીઆ ભેરા થીએં ખલીને ખીખાટીએ;
સંજાજો મેડો કર વે થ્યો તરાજી પારતે.

માઇતર જેડા વે જુકો હલીતા મડ સગે;
હથજો ટેકો ઇનીકે ડ્યો તરાજી પારતે.

અતીતજી આંગર જલેને થોડો પાં હલો;
જાધ કરીયું ઉ માડુ જુકોવો ચ્યોં તરાજી પારતે.

ભુજકે હમીસરકે આઉં સુંઞણા નતો;
“ધુફારી“કે જરા હુભ ડ્યો […]

                                      :“ધુફારી“

અય મડઇ મુંજી મઠી તોકે સલામ;
નીંગરી કચ્છજી મઠી તોકે સલામ.

પગપખારે રોજ મેરમણ જડાં;
વાણ ધંગી પ્યા તરે તેંકે સલામ.

જાધ તોજી ધીલ ધરે પરડેશમેં;
પ્રેમસે વાવડ ડીએ તેંકે સલામ.

ફૂલ કંઢા કખ ભલે તોમેં થીએ;
વાસરો ઉનતા અચે તેકે સલામ.

જન મટીજા માડુઆ ખેલે ખલક;
સર ચડાંયા ઉ મટી તેંકે સલામ.

કચ્છજે નર મ્યાં અચે કચ્છજી સુગંધ;
હી “ધુફારી” તો કરે તેંકે સલામ

                                                 :”ધુફારી”

હાલ ડસીને રોજ મલીને,યાર મડે ઇં ચોંધાવા;
પ્રેમજો રોગ લગીવ્યો તોકે,યાર મડે ઇં ચોંધાવા.

આઉં મસ્ત ભનીને રોજ ફરાં,કડેં યારેમેં ધીલધારેમેં;
જે ભાગ ભગીચેમેં,ધરિયાજે નયજે આરેમેં(૨)
તોકે ડઠી ત ધીલ થ્યો ઘાયલ,યાર મડે ઇં ચોંધાવા…પ્રેમજો

મન મોર ભનીને નાચ કરે,કડેં કોયલજો કુકાર કરે;
તુરંગ તરામેં મન મુંજો,નત રોજ બુડે ને રોજ તરે(૨)
મુંજી ફરીવઇ ધુનિયા એડી,યાર મડે ઇં ચોંધાવા… ….પ્રેમજો

કસેં રાતવરાતમેં જાગીપાં,કડેં ધોરે ડીં મેં સોણા લજે;
મન થઇને મણીધર ડોલેતો,જડેં પ્રેમજી મૌવર મનમેં વજે(૨)
ચેતો “ધુફારી” હીયોં હેરાણો,યાર મડે ઇં ચોંધાવા… ….પ્રેમજો

:પ્રભુલાલ ટાટારીઆ ”ધુફારી”